ഒരു വാഗ്ദാനം

സ്നേഹിച്ചുതീരാത്ത മനുഷ്യജന്മങ്ങൾക്കാ -
വുമോ മരങ്ങളായ്  പുനർജനിക്കാൻ ?
മണ്ണിലുറങ്ങുന്ന വിത്തുകളിലാ   -
ത്മാവിനാവുമോ  ജീവനൂതുവാൻ  ? 
ആവുമെങ്കിലെൻജീവൻ  വെടിയുന്നനേരമൊരു ,
ചെമ്പകമരമായ്ഞാനുണർത്തെണീക്കാം 
എൻ നേർത്ത ചില്ലകൾ ,നിൻജാലകത്തിലൊരു -
തണലായിനിന്നു  കഥ പറയാം 
കുയിലുകൾ  ശ്രുതിതീർത്ത രാഗങ്ങൾക്കൊണ്ടുഞാ-
നില്ലാത്ത ശൂന്യത മായ്ച്ചുതരാം 
ജീവിക്കവേ പങ്കുവെക്കുവാനാവാത്ത -
സമയമത്രയും ഞാനന്നു പങ്കുവയ്ക്കാം 
ഓർമ്മകൾജ്ജനിപ്പിക്കും സുഗന്ധമായ് ,
നീയകലും വരെ ഞാൻ പൂത്തുനിൽക്കാം 
എന്നിട്ടൊരുനാൾ നീയുമൊരു മരമായ് ജനിക്കുവാൻ 
വിത്തുകൾ ചിലതു ഞാൻ കാത്തുവയ്ക്കാം
പിന്നീടൊരിക്കൽനീ  പുനർജനിച്ചാ-
ലന്നുവേരുകളായിഞാൻ തേടിവരാം  
അന്നു ഞാൻ  ഗാഢമായാലിംഗനം ചെയ്തൊരി -
ക്കൽപ്പറയാൻമടിച്ച വാക്കുതരാം.
ഭൂമിയിൽ സഫലമാവാത്ത ജീവിതം ,
ഭൗമാന്തർഗ്ഗതത്തിൽ ജീവിച്ചുതീർക്കാം